Kainatdakı saysız-hesabsız göy cisimlərinin bir-birləri ilə toqquşmadan nizam içində hərəkət edə bilmələri, "orbitləri" nin Allah tərəfindən çox incə hesabla müəyyən edilməsi sayəsindədir. Planetlərin Günəşin ətrafında fırlanarkən izlədiyi yola "orbit" deyilir. Heç bir planet orbitindən qopub başqa istiqamətə doğru hərəkət edə bilməz. Çünki planetlər Günəşin cazibə qüvvəsinin təsirindədir. Düşünün, siz bu sətirləri oxuyarkən Dünyamız Günəş ətrafındakı orbitində saatda təxminən 108.000 kilometr sürətlə irəliləyir. Bu sürətin nə qədər böyük olduğunu belə anlaya bilərsiniz: Normal bir avtomobillə saatda çata biləcəyiniz ən yüksək sürət – təxminən 200 kilometrə qədərdir. Yəni Dünyanın Günəş ətrafında dövr etmə sürəti avtomobilin sürətindən 540 dəfə çoxdur. Bu mövzuda başqa nümunə isə belədir: bir güllə saatda təxminən 1800 kilometr sürətlə irəliləyə bilər. Dünyanın Günəş ətrafındakı dövr etmə sürəti isə bir mərminin sürətinin 60 misli qədərdir. Dünyanın bu yüksək sürətinə görə, Günəşin cazibə qüvvəsi çox əhəmiyyətlidir. Əgər bu an Günəşin cazibə qüvvəsində bir az azalma olsa, fövqəladə sürətinə görə Dünya ilə birlikdə kosmosa səpələnərik və bu, Dünyanın sonu olar ...

Tam əksi olan bir vəziyyəti düşünək, yəni Günəşin cazibə qüvvəsi artsa, Dünyamız sürətlə Günəşə yaxınlaşar və əriyərək buxarlanar. Təbii ki, biz də yox olarıq. Bundan əlavə, Günəşin cazibə qüvvəsi orbitdə irəliləyən planetlərin bir-birlərinə toqquşmalarına da mane olur. Bəs Günəş bu planetləri necə özünə doğru sürətlə çəkə bilir, heç düşündünüzmü?

Əslində, hər şey çox asandır. Bu tarazlıqları yaradan və onları bu halı ilə davamlı qoruyan üstün bir güc sahibi olan Yaradıcımız Allah’dır.

Bundan başqa, cazibə qüvvəsinə sahib olan yalnız Günəş deyil. Günəş sisteminin içərisindəki planetlərin də öz cazibə qüvvələri vardır. Məsələn, Dünyanın cazibə qüvvəsi Ayı Dünyaya doğru çəkir. Ay bu cazibə qüvvəsinə görə müəyyən uzaqlıqda sanki asılı dayanır. Bu sayədə, Yer kürəsi Ayla toqquşmaq kimi bir təhlükədən qorunmuşdur. Şübhəsiz ki, onu Yer ilə toqquşmaqdan saxlayan, Allah’ın üstün və sonsuz gücüdür.

Günəşin cazibə qüvvəsinə bənzəyən və insan həyatı üçün əhəmiyyətli olan bir cazibə qüvvəsi də vardır. Bizi yer üzündə tutan, rahatlıqla yeriyib qaçmağımızı təmin edən səbəb yenə də cazibədir. Əlinizdə bir top olduğunu düşünün. Əllərinizi topdan uzaqlaşdırdıqda, nə baş verər? Top yerə düşər, elə deyilmi? Çünki cazibə qüvvəsi onu yerə doğru çəkir. Lakin bu topu kosmosda əlinizdən buraxsanız, top düşməz. Çünki kosmosa çıxanda cazibənin təsiri itir. Buna görə də, cazibənin varlığı bizim üçün çox əhəmiyyətlidir.

Amma çox əhəmiyyətli bir mövzu da var: yerin cazibə qüvvəsinin tam hal-hazırkı ölçülərdə olması da şərtdir. Əgər az olsa bir az əvvəl dediyimiz kimi, kosmosdayıq kimi havada gəzər, yerə ayaq basa bilməzdik. Rahat hərəkət edə bilməz, davamlı bir yerdən başqa yerə çırpılar, bir addım atdıqda tullanıb tavana dəyərdik. Eyni şəkildə, əgər cazibənin şiddəti çox olsaydı, bu dəfə yerə yapışacağımız üçün yeriyə bilməzdik. Ancaq yerdə sürünərək hərəkət edə bilərdik.

Lakin bunların heç biri başımıza gəlmir. Çünki Allah yerin cazibə qüvvəsini həyatımız üçün ən uyğun ölçüdə yaratmışdır.

Bu mövzuda bir nümunə versək daha yaxşı təsəvvürünüzdə canlandıra bilərsiniz: Ayda da Dünyadakı kimi cazibə qüvvəsi vardır. Ancaq bu cazibə qüvvəsi Yerdəkinə görə daha azdır. Bu səbəbdən, Ayda həyatınızı davam etdirmək mümkün olmaz. Şübhəsiz ki, televiziyada və ya kosmosla bağlı filmlərdə astronavtların Aydakı hərəkətlərini izləmisiniz. Bütün həyatımızı belə keçirə bilərdikmi? Əlbəttə ki, yox.

İndi Günəşin cazibə qüvvəsi altındakı planetlərə qonaq gedərək səfərimizə davam edək.