Tural şəlaləyə yaxınlaşarkən barmaq uclarında və mümkün olduğu qədər səssiz getməyə başladı. Su kənarına çatanda suyun üzərindəki budaq və kötüklərin bir az da çoxaldığını gördü. Ətrafına baxıb yenə heç kəs yoxdur deyə düşündü. Böyük qardaşını çağırmaq istəyəndə birdən-birə suyun üzərində üzən çox sevimli iki heyvan gördü. Dərhal gizləndilər. Heyvanlar Turalı görmədikləri üçün işlərinə davam edirdilər. Bir müddət sonra Turalın böyük qardaşı da yanına gəldi. Böyük qardaşı "Deməli, bütün ağacları kəsib, suya daşıyan qunduzlar imiş" - pıçıldayaraq heyrətini bildirdi. Tural kitablarda gördüyü ,ancaq o qədər də yaxşı tanımadığı qunduzları canlı gördüyü üçün çox xoşbəxt idi. Bütün gün bu iki maraqlı görünüşlü canlının çalışqan işlərini izləmək fürsəti tapdılar.

Tural böyük qardaşı ilə ağacların arxasında gizlənərək sevimli qunduzların etdikləri işləri izləyirlər. Onları görməyən qunduzlar da işlərinə davam edirlər.

Turalın böyük qardaşının dediyinə görə qunduzlar suyun önünü kəsmək, sonra da burada yuva qurmaq üçün çalışırdılar. Qunduzların davranışları çox heyrətamiz idi. Ağızlarında daşıdıqları ağacları daha əvvəldən suya buraxdıqları ən böyük kötüyün önünə qoyurdular. Sonra biri sahilə çıxır və su kənarına yaxın bir ağaca yönəlirdi. Qunduz, əvvəl ağacın yarpaqları ilə bir az da qidalanır, sonra dişləri ilə ağacı dibindən gəmirməyə başlayırdı. Uzun müddət ağacın ətrafında gəzərək, hər tərəfindən bərabər şəkildə böyük səylə ağacı gəmirirdi. Ağacın ayrılacaq qismi qələm ucu şəklini alana qədər bu işə davam edirdi.

Qunduz, ağacları kəsərkən, Tural da bu kiçik heyvanın böyük ağacı necə daşıyacağını fikirləşirdi. Bu anda ağac birbaşa suyun üzərinə düşdü. Beləliklə, daşıma problemi həll oldu.

Daha sonra digəri gəldi və o da su sahilindəki ağacı dibindən gəmirməyə başladı. Onun gəmirdiyi ağac da bir müddət sonra birbaşa suya düşdü. Başqa biri, sonra biri, daha sonra biri... Qunduzların kəsdikləri bütün ağaclar birbaşa suyun üzərinə düşürdü. Sanki qunduz, ağacı necə suya salacağını hesablayaraq gəmirirdi.

Tural, çox heyrətlənmişdi, çünki onun ağlına belə bir taktika istifadə edərək ağacları daşımaqdan xilas olmaq gəlməmişdi. Böyük qardaşına bu fikrini söylədikdə onun da eyni fikirdə olduğunu gördü. Aralarında belə danışdılar:

Böyük qardaşı: düzünü bilmək istəsən, mənim də ağlıma belə taktika gəlməzdi. Amma bir kitabda oxumuşdum ki, qunduzlar ağacları düz suya salacaq şəkildə hesablayıb, müəyyən bucaq altında ağacları gəmirirlər. Bəzən müvəffəqiyyətli ola bilmədikləri hal da olur. Belə hallarda da suya sala bilmədikləri ağacları dişləri ilə dartaraq suya atırlar. Hə, Tural, hələlik bu qədər bəsdir. Düşərgəyə qayıtdıqda sənə qunduzlar haqqında daha ətraflı məlumat verərəm. İstəsən gətirdiyimiz kitablardan da qunduzlar haqqında məlumat toplaya bilərik.

Tural: Hə, istəyirəm. Qunduzların belə hesablar apara bilmələri, daha doğrusu düşünərək hərəkət etmələri məni çox təəcübləndirdi. Niyə şəlalənin qarşısını kəsərək yuva qururlar? Ağacları yeyəndə dişləri heç zədələnmir? O qədər çox sual var ki, bütün gecə səninlə danışa bilərəm

Qunduzlar işə başlamamışdan əvvəl yığdıqları yarpaqlardan yeyərək güc toplayır.

Böyük qardaşı: Yaxşı, amma dərhal düşərgəyə qayıtmaq lazımdır. Danışmağa vaxt yoxdur, hava qaralır, anamız narahat olar. Həm çox yuxum gəlir, həm də çox yorulmuşam. Gəl tez gedək.

Yuxarıda qunduzların dişləri ilə kəsdikləri ağacları görürsünüz. Böyük ağacları aşırdan bu kiçik heyvanların Allah’ın ilhamı ilə hərəkət etdiklərini əsla ağlınızdan çıxarmayın. Qunduzlar ağacları suya sala bilmədikləri zaman dişləri ilə su kənarına tərəf dartırlar. Üstdəki şəkildə erkək qunduzu ağac daşıyarkən görürsünüz.

Düşərgəyə qayıtmaq üçün tələsik yola çıxdılar. Ancaq beynindəki sual işarələri Turalı yol boyu rahat buraxmadı. Düşərgəyə çatdıqda analarının onlar üçün hazırladığı ləzzətli yeməklərdən yedilər. Sonra birlikdə kitablara baxmağa başladılar, qunduzlar haqqında bir şey oxumağa başlayanda Tural heç gözləmədiyi bir sürprizlə qarşılaşdı. Böyük qardaşı yuxuya getmişdi. Tural da kitabları tək oxumağa başladı.

Tural yeni plan qurdu. Sabah səhər tezdən gedib, qunduzlarla tanış olacaq, nələr edəcəklərini onlardan öyrənəcəkdi.Bir müddət sonra o da yuxuya getdi.