Əgər Dünyamız Günəşə hal-hazırda olduğu məsafədən bir az daha yaxın olsaydı, nələr olardı? Əslində, bu sualın cavabı hamınız üçün çox asan olmalıdır. Çünki hər kəs Günəşin istiliyinin qovurucu olduğunu bilir. Uşaqlar, bu istilik səbəbindən nə hal-hazırkı atmosferə sahib olardıq, nə də okeanlara və dənizlərə ... İstilik o qədər yüksək olardı ki, yer üzündəki suyun çoxu buxarlanardı. Təbii, o zaman da yer üzündə heç su qalmazdı. Yer üzü tamamilə səhra kimi quru olardı.

Məsələn, əvvəlki hissədə izah etdiyimiz Venera planeti, bildiyiniz kimi Günəşə Dünyamızdan daha yaxındır. Buna görə də, Venera planetindəki temperatur Yer planetindəki temperaturdan qat-qat yüksəkdir. Bu temperatur 475 dərəcəyə qədər qalxa bilir. Bu temperaturun nə qədər yüksək olduğunu zehninizdə canlandırmaq üçün bunu düşünün! Ocağa qaynaması üçün su qoysanız, suyun temperaturu 100 dərəcəyə çatanda qaynamağa başlayır.

Bir də tam tərsini düşünək. Dünyamız Günəşə hal-hazırda olduğu məsafədən bir az daha uzaq olsaydı, nə olardı? Təbii ki, uşaqlar, belə bir vəziyyətdə də tam tərsinə, Dünyamız daha az qızardı. Daha az qızdıqca nə olardı, gəlin fikirləşək. Yer üzündəki suyun çoxu donaraq buza çevrilərdi. Belə bir vəziyyətdə isə Dünyamızın səthi Günəşə bizdən bir az daha uzaq olan Marsın buzlarla örtülü quru səthinə bənzəyərdi. Bu iki vəziyyətdən belə nəticə çıxara bilərik: Dünyamız tam olması lazım olan yerdə dayanır. Bəs bu necə ola bilər? Dünyamızın tam lazım olan yerdə dayanması təsadüf ola bilərmi? Təbii ki, ola bilməz. Dünya cansız və şüursuz planetdir. Kosmosda özünə ən uyğun yeri təyin etməsi və təsadüfən yerləşməsi mümkün deyil. Dünyanın ən uyğun yerdə dayanması, əskiksiz və qüsursuz yaratmağa qadir olan Allah’ın əsəridir.

Elmin əldə etdiyi son nəticələr Günəş sistemindəki digər planetlərin varlığının da Dünyanın təhlükəsizliyi üçün böyük əhəmiyyət daşıdığını göstərmişdir. Yupiterin mövqeyi buna nümunədir. Əslində, Günəş Sisteminin ən böyük planeti olan Yupiter varlığı ilə Dünyanın tarazlığını təmin edir.

Əgər Yupiterin olduğu yerdə bu böyüklükdə planet mövcud olmasaydı, Dünya kosmos boşluğunda gəzişən meteroit daşlarına və quyruqlu ulduzlara hədəf olardı. Qısası, Yupiter sanki Dünyanı qoruyan qalxan kimidir. Əgər Yupiter hal-hazırda olduğu orbitdən başqa orbitdə olsaydı, üzərində yaşadığımız planet və əlbəttə ki, bizlər də mövcud olmazdıq.

Bütün bunları bilən ağıllı insan kainatda heç bir şeyin məqsədsiz və nəzarətsiz yaradılmadığını anlayar. Bu, Quran ayəsində belə təsvir edilir:

Doğrusu, göylərin və yerin xəlq edilməsində, gecə ilə gündüzün bir-birini əvəz etməsində ağıllı adamlar üçün dəlillər vardır. (Ali-imran surəsi, 190)

Bu ayədən də aydın olduğu kimi, hər insan göylərin və yerin yaradılması haqqında düşünməlidir. Bu kitabdan öyrəndiklərimiz Allah’ın kainatı yaratmasındakı üstün gücünü göstərir. Bu məlumatları düşündükdə Allah’ın gücünü daha yaxşı qavrayacaqsınız.