Əgər xatırlayırsınızsa, əvvəlki bölümlərdə planetlərin çox fərqli böyüklüklərdə olduqlarından bəhs etmişdik.

İndi Dünyamızı digər planetlərlə böyüklüklərinə görə müqayisə edək. Gəlin belə bir bənzətmə edək: Dünyamızı kiçik göy noxud dənəsi boyda düşünək. Bu vəziyyətdə sıra ilə Merkuri küncüt dənəsi, Venera Dünyamız kimi göy noxud, Mars qarpız çəyirdəyi, Yupiter portağal, Saturn naringi, Uran və Neptun iri gilas dənəsi, Pluton isə yenə küncüt dənəsi boyda olar. Bunların yanında Günəş isə basketbol topundan daha böyük kürə formasında qalacaq.

Yaxşı, bu qədər fərqli böyüklükdəki planetlər içində Dünyamızın böyüklüyü təsadüfən müəyyən olmuşdur?

Xeyr! Yer kürəsinin xüsusiyyətlərini araşdırdıqda, üzərində yaşadığımız bu göy cisminin lazımi böyüklükdə olduğunu görürük.

Dünya daha kiçik olsaydı, cazibə qüvvəsi çox zəifləyəcək və atmosferi Dünyanın ətrafında saxlaya bilməyəcəkdi. Atmosferin olmaması isə bildiyiniz kimi kosmosdakı meteroitlərin, zərərli şüaların sürətlə Dünyaya gəlməsi, oksigenin yox olması, qısası, canlıların məhvi deməkdir. Əgər Dünya daha böyük olsaydı, bu dəfə də cazibə qüvvəsi çox artacaq və bəzi zəhərli qazları da saxlayaraq atmosferi öldürücü hala gətirəcəkdi.

Ayaqqabıçı, dülgər və ya misgərin hazırladığı hər məhsul bu ustaların əməyi nəticəsində ərsəyə gəlir. Ustalar işlərinin hər mərhələsində planla, ölçüb-biçərək iş görürlər. Ortaya çıxan bu sənət əsərlərinin düşünülmədən, planlanmadan, təsadüfən meydana gəldiyini söyləmək nə qədər gülməlidirsə, kainatdakı milyardlarla qalaktikanın, planetin və ulduzun da özbaşına, təsadüfən meydana gəldiyini söyləmək də o qədər gülməli və ağılsızlıqdır.

Dünyanın çəkisi ilə yanaşı, daxili quruluşu da xüsusi olaraq yaradılmışdır. Daxildəki təbəqələr bir-birinin ətrafında hərəkət edir. Bu hərəkət Dünya ətrafında güclü maqnit sahəsi əmələ gətirir. Bu maqnit sahəsi isə yer üzündəki həyatın qorunması baxımından çox əhəmiyyətlidir. Maqnit sahəsini qoruyucu zirehə bənzədə bilərik. Dünyaya yönələn zərərli şüalar bu zirehlə toqquşaraq  geri qayıdırlar.

Bu qoruyucu zireh sayəsində Yer kürəsi kosmosdan gələn təhlükələrə qarşı qorunur. Günəşdən və Günəşdən başqa digər ulduzlardan gələn öldürücü şüalar Dünyanın ətrafındakı bu qoruyucu qalxandan keçə bilmirlər.

Elmin ortaya qoyduğu digər həqiqətlər bizlərə kainatın özbaşına olmadığını göstərir. Əlbəttə ki, bütün kainata hakim olan, ona istədiyi surəti verən, qalaktikaları, ulduzları və planetləri qüdrəti altında tutan, O üstün Yaradıcı - bütün kainatın Rəbbi olan Allah’dır.

Üzərində yaşadığımız mavi planet də Allah tərəfindən xüsusi yaradılmışdır. Allah Quranda bu mükəmməl yaradılışı Naziat surəsinin 30-cu  ayəsində “yeri döşəyib" ifadəsi ilə təsvir edir. Bu ifadə Dünyanın nizamlı və insanın ehtiyaclarına uyğun şəkildə Allah tərəfindən yaradıldığını izah edir.

Uşaqlar, yolumuzun bundan sonrakı hissəsini Dünyada davam etdirəcəyik. Möhtəşəm mavi aləmə, yəni okeanlara və dənizlərə qonaq olacağıq. İndi Rəbbimizin bütün bunları hansı məqsədlərlə yaratdığını və bizə nemət olaraq təqdim etdiyini araşdıracağıq.