Orta böyüklükdəki yağış buludunda təxminən 300 min ton (300 milyon kq) su olur

Səmaya baxarkən havada ağ və ya boz rəngli pambıq topalarına bənzər buludları görürük. Hətta bəzən onları müxtəlif formalarda görüb tanıdığımız şeylərə də bənzədirik, elə deyilmi? Bəs heç düşündünüzmü, buludlar necə meydana gəlir? İstəsəniz birlikdə bu pambıq kütlələrinin necə meydana gəldiyini öyrənək.

Hər gün yerdəki suların bir hissəsi Günəşin istiliyi nəticəsində buxarlanır. Yəni su çox kiçik damlacıqlar formasında havaya qarışır. Havaya qarışan belə suya "su buxarı" deyilir. Yerə yaxınlaşan hava isinir, istilənən hava isə yüksələrək bu su buxarını da özü ilə birlikdə yuxarıya qaldırır. Yüksəkdəki soyuq hava ilə qarşılaşan isti havanın içindəki su buxarı buz kristallarına çevrilir. Bunlar da öz növbəsində buludları əmələ gətirir.

Duzlu dənizlərdən, göllərdən buxarlanan su özü ilə birlikdə duzları da yuxarıya daşıyır. Bu duz dənələri gözlə görünə bilməyəcək qədər kiçikdir. Atmosferə küləyin bu damlacıqları daşıması sayəsində, gündə 27 milyon ton duz əlavə olunur. Bu duzlar sonra yaranacaq yağış damlasının nüvəsini təşkil edir.

Buludlar dünyamızdan baxanda pambıq kimi görünür. Buna görə də, buludların çox yüngül olduqlarını düşünə bilərsiniz. Halbuki, həmin su kristalları kifayət qədər böyüyüb yağışa çevrildikdə tonlarla su axdığını görürsünüz. Orta böyüklükdəki bir yağış buludunda 300 min ton su olur. (1 ton 1000 kiloqrama bərabərdir. 300 min ton isə 300 milyon kiloqramdır. Yetkin bir insanın orta ağırlığının 60-70 kiloqram olduğunu düşünsəniz, bunun nə qədər böyük bir rəqəm olduğunu anlayarsınız.) Bəli, səhv eşitmədiniz, havada asılı dayanan 300 min ton!!!

Allah bu nəhəng buludlardan yer üzünü canlandıracaq yağışı yağdırır. Belə olduqda, hər yerə asanlıqla su çatır. Rəbbimiz bizə Quranda buludların yağışa necə çevrildiyini bu ayədə bildirir:

Məgər görmürsənmi ki, Allah buludları qovur, sonra onları bir-birinə qovuşdurur, sonra da onları bulud topasına çevirir. Sən onun arasından yağmur çıxdığını görürsən… (Nur surəsi, 43)

Bundan başqa, Allah Quranda göydən endirdiyi suyun təmizliyinə də diqqət çəkmişdir:

... Biz, göydən tərtəmiz su endirdik. (Furqan surəsi, 48)

Ayədə ifadə edildiyi kimi, su göydən tərtəmiz şəkildə enir. İçində az nisbətdə duz və bəzi minerallar var. Əslində, bu da Allah’ın böyük rəhmətidir. Çünki torpaq yağış suyundakı bu az miqdardakı duz və minerallar sayəsində qidalanır. Əgər okeanlardan buxarlanan su yağış olaraq yağdığı zaman tərkibində duz çox olsaydı, bu, yer üzünə böyük zərər verərdi. Çünki yağış suyu çox duzlu olsaydı, torpağı və bitkiləri yandırardı. Bitkilər öldüyü zaman isə yemək tapa bilməyən canlılar da yox olardılar. Qısası, Dünyadakı həyat qısa bir müddət içində sona çatardı. Ancaq bu baş vermir. Çünki Allah insanlara qarşı böyük mərhəmət sahibidir. Quranda bu, belə bildirilir:

İçdiyiniz suyu gördünüzmü? Onu buluddan siz endirirsiniz, yoxsa Biz endiririk? Əgər istəsəydik, onu acı edərdik. Bəs nə üçün şükür etmirsiniz? (Vaqiə surəsi, 68-70)

Ayədə hər şeyin insanların yaşamasına uyğun olaraq yaradıldığı xəbər verilir.

Uşaqlar, gördüyünüz kimi əslində həyatımız üçün lazımlı heç bir şeyi etməyə, ya da nəzarət altında saxlamağa gücümüz yoxdur. Allah istəməsə, yer üzündə yaşamağımız mümkün olmazdı. Buna görə də, hər an hər şeyi Allah’ın yaratdığını xatırlayıb həmişə Ona şükür etməliyik.

Yer üzündəki suyun necə buxarlandığını, buludların necə meydana gəldiyini və necə yağışa çevrildiyini öyrəndik. Gəlin indi də yağışın yer üzünə müəyyən ölçü ilə endiyini öyrənək. O halda yolumuza yağışların hansı ölçü nisbətində yağdığı mövzusunu izah edərək davam edək.